തിരുവനന്തപുരം: വി.എസ്.അച്യുതാനന്ദന് പറയാന് പ്രത്യേകിച്ച് ഭരണനേട്ടങ്ങളൊന്നുമില്ലെന്ന് കേന്ദ്രപ്രതിരോധമന്ത്രി എ.കെ.ആന്റണി. പറയാന് നേട്ടങ്ങളൊന്നുമില്ലാത്തതിനാലാണ് അദ്ദേഹം ഇപ്പോഴും അഴിമതിക്കാര്ക്കെതിരെയും പെണ്വാണിഭക്കാര്ക്കെതിരെയും ശക്തമായി നിലകൊള്ളുമെന്ന് ആവര്ത്തിച്ചുക്കൊണ്ടിരിക്കുന്നത്. അഞ്ച് വര്ഷത്തെ ഭരണത്തിനിടയ്ക്ക് എത്ര അഴിമതിക്കാരെ അറസ്റ്റ് ചെയ്ത് ജയിലിലടച്ചുവെന്ന് മുഖ്യമന്ത്രി വ്യക്തമാക്കണം-ആന്റണി ആവശ്യപ്പെട്ടു. തിരുവനന്തപുരം പ്രസ്ക്ലബിന്റെ 'ജനവിധി 2011' പരിപാടിയില് പങ്കെടുത്ത് സംസാരിക്കുകയായിരുന്നു അദ്ദേഹം. മുഖ്യമന്ത്രിയായിരുന്നപ്പോഴും അച്യുതാനന്ദന് പ്രതിപക്ഷനേതാവിന്റെ ശൈലിയാണ് സ്വീകരിച്ചത്. അഞ്ച് വര്ഷം മിണ്ടാതിരുന്നിട്ട് ഇപ്പോള് യുദ്ധപ്രഖ്യാപനം നടത്തുന്ന മുഖ്യമന്ത്രി സാക്ഷരകേരളത്തിന് അപമാനമാണ്. വീണ്ടും അധികാരത്തില് വന്നാല് അദ്ദേഹം ഇതുതന്നെ ആവര്ത്തിക്കും. കേന്ദ്രസര്ക്കാര് അനുവദിച്ച പല പദ്ധതികളും സംസ്ഥാന സര്ക്കാരിന്റെ പിടിവാശി കൊണ്ട് നഷ്ടമായി. സ്മാര്ട്ട് സിറ്റി നടപ്പിലാക്കാന് അഞ്ച് വര്ഷം വൈകിയത് മുഖ്യമന്ത്രിയുടെ പിടിവാശി മൂലമാണ്-ആന്റണി പറഞ്ഞു. ഭരണവീഴ്ചയ്ക്ക് മറ്റുള്ളവരുടെമേല് പഴിചാരുകയാണ് അച്യുതാനന്ദന് ചെയ്യുന്നത്. അഞ്ച് വര്ഷം പാര്ട്ടി സെക്രട്ടറിയും പാര്ട്ടിയും ഭരിക്കാന് അനുവദിച്ചില്ലെന്ന് പരാതി പറഞ്ഞുനടക്കുകയായിരുന്നു അദ്ദേഹം-ആന്റണി ചൂണ്ടിക്കാട്ടി. പാര്ട്ടി പറഞ്ഞാല് കേള്ക്കാത്ത മുഖ്യമന്ത്രിയാണെന്നും തുടര്ച്ചയായി അച്ചടക്കലംഘനം നടത്തുകയാണ് വി.എസ്സെന്നും പരാതിപ്പെട്ടിരുന്ന സി.പി.എം നേതൃത്വം ഇപ്പോള് അദ്ദേഹത്തെ ഒരേയൊരു നേതാവായി ഉയര്ത്തിക്കാണിക്കുകയാണ്. ഭരണം നേടാനുള്ള കുതന്ത്രമാണിത്-ആന്റണി പറഞ്ഞു. കേരളം ഭരണമാറ്റം ആഗ്രഹിക്കുന്നുണ്ട്. ഒരു ശക്തിയ്ക്കും യു.ഡി.എഫിനെ ഭരണത്തില് വരുന്നതില് നിന്ന് തടഞ്ഞുനിര്ത്താനാകില്ല. ഇടിമുഴക്കം പോലെ ശക്തമായി യു.ഡി.എഫ് അധികാരത്തില് തിരിച്ചുവരും. വികസനം മാത്രമാണ് യു.ഡി.എഫിന്റെ അജണ്ട. യു.ഡി.എഫിന്റെ നേതൃത്വത്തില് കേരളം മെച്ചപ്പെടും. അടുത്ത അഞ്ച് വര്ഷം സമഗ്രവികസനത്തിന്റേതാകും. കേന്ദ്രസര്ക്കാരുമായി കൈകോര്ത്ത് പോകുന്ന സര്ക്കാര് കേരളത്തിലുണ്ടായാല് നമുക്ക് അതിവേഗം മുന്നേറാനാകും-ആന്റണി പറഞ്ഞു. രാഷ്ട്രീയത്തിലെ ഇപ്പോഴത്തെ രീതിയില് പ്രതികരിക്കാന് താനില്ല. തിരഞ്ഞെടുപ്പ് ഒരിക്കലും വാക്പയറ്റല്ല. അടുത്ത തവണ ആര് ഭരിക്കണമെന്നത് തീരുമാനിക്കാനുള്ളതാണ് തിരഞ്ഞെടുപ്പ്. ഇന്ന് എവിടെയും ഇന്ത്യക്കാരന് തല ഉയര്ത്തിനില്ക്കാം. ഇന്ത്യ ആരുടെയും പിറകിലല്ല. അടുത്ത ലോകശക്തികള് ചൈനയും ഇന്ത്യയുമാണെന്നാണ് ലോകം പറയുന്നത്. ഈ നേട്ടങ്ങള്ക്കെല്ലാം കാരണം യു.പി.എ സര്ക്കാരും മന്മോഹന് സിങിന്റെയും സോണിയാ ഗാന്ധിയുടെയും നേതൃത്വവുമാണ്. സാമ്പത്തികരംഗത്തും സാങ്കേതികരംഗത്തും അതിവേഗം വളര്ന്നുകൊണ്ടിരിക്കുന്ന ഇന്ത്യയില് അടുത്ത അഞ്ച് വര്ഷത്തേയ്ക്ക് കേരളത്തിന്റെ സ്ഥാനമെന്തായിരിക്കണമെന്ന് തീരുമാനിക്കേണ്ട തിരഞ്ഞെടുപ്പാണ് വരാന് പോകുന്നത്. അതിനാല് യു.ഡി.എഫ് തീര്ച്ചയായും ജയിക്കേണ്ടതുണ്ട്. യു.ഡി.എഫ് കേരളം ഭരിച്ചപ്പോഴെല്ലാം വികസനമുണ്ടായിട്ടുണ്ട്. സമാധാനം, വികസനം, എല്ലാവര്ക്കും വീട്, ശുദ്ധജലം തുടങ്ങിയ വാഗ്ദാനങ്ങളാണ് യു.ഡി.എഫിന് മുന്നോട്ടുവയ്ക്കാനുള്ളത്. യു.ഡി.എഫിന്റെ മുഖ്യമന്ത്രി ആരായിരിക്കുമെന്നതിനെക്കുറിച്ച് ആര്ക്കും സംശയമില്ല. എല്ലാവര്ക്കും അതറിയാം. എന്നാല് പാര്ട്ടിയെ മറികടന്ന് തനിക്കത് പ്രഖ്യാപിക്കാനാവില്ല. മുഖ്യമന്ത്രിയെ തീരുമാനിക്കുന്നതിന് കോണ്ഗ്രസില് ചില നടപടികളുണ്ട്. അല്ലാതെ അക്കാര്യത്തില് യാതൊരു തര്ക്കവുമില്ല-ആന്റണി വ്യക്തമാക്കി. അഴിമതിക്കാര് ആരായാലും അവര് ശിക്ഷിക്കപ്പെടണമെന്നതാണ് യു.പി.എ സര്ക്കാരിന്റെ നയം. അതിനാലാണ് 2ജി സ്പെക്ട്രം കേസ് അന്വേഷണത്തിന്റെ നേതൃത്വം സുപ്രീം കോടതി നേരിട്ട് നടത്തണമെന്ന് സര്ക്കാര് കോടതിയോട് ആവശ്യപ്പെട്ടത്. കേന്ദ്രസര്ക്കാരിന് ഒന്നും ഒളിച്ചുവെക്കാനില്ല. അഴിമതിക്കെതിരെ ശക്തമായ നിലപാടാണുള്ളത്-ആന്റണി പറഞ്ഞു
