എസ്.എസ്.എല്.സി. ഫലം വ്യാഴാഴ്ച പ്രഖ്യാപിക്കും. വൈകീട്ട് നാലരയ്ക്കാണ് ഫലപ്രഖ്യാപനം. ഹര്ത്താല് പ്രമാണിച്ച് നേരത്തെ നിശ്ചയിച്ചിരുന്നതില്നിന്ന് ഒരു ദിവസംമുമ്പേ ഫലം പ്രഖ്യാപിക്കാന് ബുധനാഴ്ച തീരുമാനിക്കുകയായിരുന്നു. വ്യാഴാഴ്ച ഉച്ചയ്ക്ക് എസ്.എസ്.എല്.സി. ബോര്ഡ് യോഗം ചേരും. തുടര്ന്ന് വൈകീട്ട് ഫലപ്രഖ്യാപനം നടക്കും. സാധാരണയായി മെയ്മാസത്തിലാണ് ഫലം പ്രഖ്യാപിക്കുക. ആദ്യമായാണ് ഏപ്രിലില്ത്തന്നെ ഫലം പ്രസിദ്ധീകരിക്കുന്നത്. എസ്.എസ്.എല്.സി. ഫലം www.results.itschool.gov.in എന്ന പോര്ട്ടലില് അറിയാം. ഫലപ്രഖ്യാപനം നടന്ന ഉടന് മുഴുവന് വിദ്യാര്ഥികള്ക്കും ഫലമറിയാനും പ്രിന്റൗട്ട് എടുക്കാനും കഴിയും. ഈ മാര്ക്ക് ലിസ്റ്റ് പ്ലസ് വണ് പ്രവേശനത്തിന് അപേക്ഷിക്കാന് ഉപയോഗിക്കാം. ഐ.ടി@സ്കൂള് വെബ് പോര്ട്ടലില് മൊബൈല് നമ്പര് രജിസ്റ്റര് ചെയ്ത വിദ്യാര്ഥികള്ക്ക് ഉടന് ഫലം സൗജന്യ എസ്.എം.എസ്സിലൂടെ നല്കാനും സംവിധാനം ഒരുക്കിയിട്ടുണ്ടെന്ന് ഡയറക്ടര് അന്വര് സാദത്ത് അറിയിച്ചു. ഐ.ടി@സ്കൂള് ബ്രോഡ്ബാന്ഡ് ഇന്റര്നെറ്റ് സൗകര്യം ലഭ്യമാക്കിയിട്ടുള്ള എല്ലാ സ്കൂളുകളിലും വിദ്യാര്ഥികള്ക്ക് ഫലമറിയാനുള്ള സൗകര്യം പ്രഥമാധ്യാപകര് ഒരുക്കും.
ചൊവ്വാഴ്ച നിശ്ശബ്ദപ്രചാരണത്തില് അവസാന നിമിഷ തന്ത്രങ്ങളെല്ലാം പയറ്റിയാണ് സ്ഥാനാര്ഥികള് ബൂത്തുകളിലേക്ക് ഉറ്റുനോക്കുന്നത്. പ്രചാരണം അവസാനിച്ചപ്പോള് മുമ്പൊരിക്കലുമില്ലാത്തവിധം പൊട്ടിത്തെറികളുണ്ടായത് ആശങ്കയ്ക്ക് കാരണമായിട്ടുണ്ട്. നിര്ഭയമായി വോട്ട്ചെയ്യാനുള്ള സാഹചര്യമൊരുക്കാന് സുരക്ഷാക്രമീകരണങ്ങള് തിരഞ്ഞെടുപ്പ് കമ്മീഷന് സജ്ജമാക്കി. 3703 പ്രശ്നസാധ്യതാ ബൂത്തുകള് ഇതിനകം തിരിച്ചറിഞ്ഞിട്ടുണ്ട്. ഇതില് 93 ബൂത്തുകളിലെ നടപടിക്രമങ്ങള് വെബ്കാസ്റ്റ് ചെയ്യും.
ഇനിയും സ്ലിപ്പ് കിട്ടാത്തവര്ക്ക് ബൂത്ത്പരിസരത്തുവെച്ച് സ്ലിപ്പ് വിതരണം നടത്താനാണ് കമ്മീഷന്റെ തീരുമാനം. ഇതിനായി ഹെല്പ് ഡെസ്കുകള് പ്രവര്ത്തിക്കും. പ്രചാരണത്തില് കര്ശന നിയന്ത്രണങ്ങളും മേല്നോട്ടവും ഉറപ്പുവരുത്താന് കമ്മീഷന്കഴിഞ്ഞ ഒരു തിരഞ്ഞെടുപ്പുകൂടിയാണിത്. പോളിങ് സാമഗ്രികളുടെ വിതരണം ചൊവ്വാഴ്ച പൂര്ത്തിയായി. ഒന്നേകാല് ലക്ഷം ജീവനക്കാരെയാണ് തിരഞ്ഞെടുപ്പ് ജോലിക്ക് നിയോഗിച്ചിരിക്കുന്നത്. വൈകീട്ട് അഞ്ചുവരെയാണ് വോട്ടെടുപ്പ്.
