കോഴിക്കോട്: ജമാ അത്തെ ഇസ്ലാമിയുമായുള്ള ബന്ധം എന്താണെന്ന് സി.പി.എം വ്യക്തമാക്കണമെന്ന് രമേശ് ചെന്നിത്തല. സി.പി.എമ്മിന്റെ അവസരവാദ രാഷ്ട്രീയത്തിന് ഉദാഹരണമാണിതെന്നും അദ്ദേഹം ആരോപിച്ചു.നിയമസഭാ തിരഞ്ഞെടുപ്പില് ഇടതുമുന്നണിയെ പിന്തുണയ്ക്കാനുള്ള ജമാ അത്തെ ഇസ്ലാമി കേരള ഘടകത്തിന്റെ തീരുമാനത്തില് പ്രതിഷേധിച്ച് പൊളിറ്റിക്കല് സെക്രട്ടറിയും അഖിലേന്ത്യാ പ്രതിനിധി സഭാ അംഗവുമായ ഹമീദ് വാണിമേല് സംഘടനയില് നിന്ന് ഞായറാഴ്ച രാജിവെച്ചിരുന്നു.
ജമാ അത്തെ ഇസ്ലാമിക്കെതിരെ പൊതുസമൂഹത്തില് അടിസ്ഥാനരഹിതമായ പ്രചാരണം നടത്തിയ പാര്ട്ടിയെ പിന്തുണയ്ക്കാനുള്ള തീരുമാനം രാഷ്ട്രീയ കാപട്യമാണെന്നും ഇതുസംബന്ധിച്ച് സംഘടനയ്ക്കുള്ളില് ചര്ച്ച നടത്തിയിട്ടില്ലെന്നും ഹമീദ് പത്രസമ്മേളനത്തില് വെളിപ്പെടുത്തിയിരുന്നു. ഇത് സി.പി.എമ്മിന്റെ രഹസ്യ അജണ്ടകള്ക്കുള്ള ശക്തമായ തെളിവാണ്- ചെന്നിത്തല പറഞ്ഞു.
കെ. സുധാകരനെതിരായ വിജിലന്സ് കേസ് രാഷ്ട്രീയ പകപോക്കലാണെന്നും അദ്ദേഹം വ്യക്തമാക്കി. മുസ്ലീം ലീഗ് ഉപമുഖ്യമന്ത്രി സ്ഥാനം ആവശ്യപ്പെട്ടെന്ന മുഖ്യമന്ത്രിയുടെ ആരോപണവും ചെന്നിത്തല നിഷേധിച്ചു. യു.ഡി.എഫിനുള്ളില് ഇക്കാര്യം ചര്ച്ച ചെയ്തിട്ടില്ലെന്നും ചെന്നിത്തല പറഞ്ഞു.
